بقلم : احمد ابو سمرة

عصفور بيرحل من بلاد الموت

الي روح الفنان عاطف سالم

وكأنك راسم عصفورة بتخايل ضحكة قلبك علي ورق التوت
الموت بيخط أخر حرف ف تعويذة روحك
وأنت مسافر للدنيا التانية
يمكن ترجع وقت المراويح
والجرس بيدق
بندول القلب يطير ع البيت
وانا وأنت طيور بتهاجر مع أخر الشتويه
لبلاد وناس بلون الزرع
بتلملم ف الورق الأبيض وبتنشر أخر اهه طالعه لفوق
وتعيط ع الصحبه ترق الشمس
وأنت بترسم أخر لقطة ف نعي قصيدة
نامت علي كيفها وهربت فيك
أنا لسه ساقيك العشق وشارب
سكران خلقات
حلقات الذكر ف روحك حي
وضي معافر كان واقف جنب العصفور
بيرسم دواير رحيل الأوليا
ف دنيا جديـــــــده
من عمر القلب العابد
ملقيتش غير ناجي العلي
وجاهين بياخدك بالأحضان
ـــــــــــــــــــــــ
أحمد أبوسمره
السويس في 18/12/2015