تحدث الفنان رضا حامد عن قلة الفرص في الوسط الفني، مشيرا إلى أنه يسعى للتواصل مع النقابة بشأن العمل مجددا: "مقدرش أقول إني ماتواصلتش مع النقابة، تواصلت بس مع اللي ممكن يحس ويفهم مين رضا حامد، يعني إمبارح بالتحديد لسه مكلم دكتور أشرف زكي، قالي أهلا يا أستاذي أنا درّست لـ أشرف".

وأضاف، خلال حواره مع الإعلامية إنجي هشام في برنامج المنسي عبر قناة هي: "قلت له أنا جراند سهل جدا أشتغل، قالي أنا كمان بقيت جراند، قلت له لا أنا جراند كبير أنت جراند صغير، ده اللي ممكن أكلمه بصفته النقيب بتاعنا وإني كنت أستاذه، لكن ماينفعش بقى أكلم كل واحد".

وكشف عن تفاصيل محاولاته للتعاون مع عائلة السبكي: "تواصلت مع السبكية لكن محمد مش موجود هنا، دا اللي اشتغلت معاه كتير، وأحمد اشتغلت معاه فيلم واحد كان هائل، وكان مبسوط جدا مني، وفجأة مع كتر الأعمال اللي بيعملوها نسيوا رضا حامد، رغم إنه كان مبهور بيا".

وتابع: "أهم شغلانة للنقابة أنهم يوفروا شغل، في فنانين بتعمل ٨ و٩ مسلسلات، وفيه فنانين بنفس المستوى مش شغالة طب ليه، النقابة لها دور واللي يقول غير كده جاحد ومعندوش فهم للموضوع".