Login to your account

Username *
Password *
Remember Me


بقلم : شرين سعد أحمد
شاعرة جنوب الوادي

أنا المصرية وطباعي
تقول عني دي شرقية
ومش مكسوفة من لوني
ولو قالوا دي خمرية
و حتى الكل يشهدلي
لإني ف شدتي قوية
،،،،،،،،،،،،،،،،،،،،،
أنا الصعيدية من قِبْلي
ومين في الجدعنة قَبْلي
في بيتي وغيطي سدادة
وطاعتي لراجلي دي عبادة
ولو ضاقت عليه مرة
بيجي الخير يقول قابلي
،،،،،،،،،،،،،،،،،،
أنا الفلاحة من بحري
في دلتا بلادي من بحري
أنا اللي ولدت رجاله
لا هم نيين ولا عواله
ومن نيلهم أهم شربوا
وصادوا من سمك بحري
،،،،،،،،،،،،،،،،،،،،
أنا السيناوية زاينة الأرض
وصنا ترابنا زي العرض
جبالنا شامخة زيينا
جمالها طل في عنينا
ولا نركع لغير الله
نصلي السنة و يا الفرض
،،،،،،،،،،،،،،،،،،،،
أنا النوبية لون التمر
وفيا الحسن قايد جمر
وحارسة السد بعيوني
ودهبي وطيني نادوني
وأسوان بلدي لو تحتاج
تناديني وتؤمر أمر
،،،،،،،،،،،،،،،،،،،
أنا البدوية من مطروح
معاي الفخر وين ما بروح
أنا اللي رعيت ورا غنمي
وأنا اللي سمعت صوت نغمي
وأنا اللي يتحلف بيا
ومصر في قلبي نبض الروح
،،،،،،،،،،،،،،،،،،،،،،،
أنا السويسية بنت قنال
وبورسعيدية لابسة الشال
ترابك يا إسماعيلية
بينشد ليا أغنية
بنات جدعان ومن يومهم
يودوا العم ويا الخال
،،،،،،،،،،،،،،،،،،،،

قيم الموضوع
(0 أصوات)

فيس بوك

Ad_square_02
Ad_square_03
.Copyright © 2024 SuezBalady