بقلم : مرسي بدير

خليج السويس يستغيث

مفيش في البلد دي حد بيحبها وينقذنا ؟
هو ده حال خليج السويس اللي بيعتبر المصدر الرئيسي للأسماك في مصر وصل بينا الحال ان اسعار الاسماك اصبحت كالنار ودهنتيجة قلة المعروض من الاسماك ..لان طبعا الاسماك تخضع لقانون العرض والطلب كل ما زاد المعروض قل السعر والعكس صحيح وطبعا انخفاض انتاج الاسماك في خليج السويس ليه اسباب عديدة منها

١-مشروع تنمية خليج السويس بحيث ان خليج السويس قبل المشروع كان بينتج في اليوم من ٣٠:٤٠ الف طاولة سمك لكن بعده انتاجه لا يتعدى ٤ او ٥ الاف طاولة يوميا وده نتيجة تلوثات المصانع وصرفها اللي متجه للبحر ...ومفيش اي اهتمام ومفيش حد يجرؤ يعمل محاضر ضد المصانع دي لانها مملوكة لناس مسنودة في البلد

٢_ صيد الزريعة بحيث ان المنظر في (الكبانون ) يحزن وعربيات الزريعة بتحمل وبتسافر بتصاريح قانونية بسبب تقنين صيد الزريعة

٣-الصيد الجائر ...الخليج فيه ٣ حرف صيد (جر- شانشولا-سنارة) ودلوقت اصبحت لانشات السنار كلها بتشتغل في الجر والشانشولا تحت انظار واسماع جميع المسئولين

مش معنى ان الاسماك خاضعة لقانون العرض والطلب ان الدولة ترفع ايديها لازم الدولة بقوانين تتدخل لانهاء هذه المخالفات لان قبل ما المستهلك بيعاني الصياد بيعني وصحاب المراكب اتخرب بيوتها ..لحد امتى هنفضل في الفوضى دي ؟

#خليج_السويس

وعلى جانب اخر استغاث المواطن السويسي محمد فاروق من صيد الزريعة قائلا :

الى السيد اللواء/محافظ السويس
الى السيد/ قائد حرس الحدود بالسويس
الى السيد/ المسؤول عن الثروه السمكيه.
الى كل من يهمه الامر.
الثروه السمكيه بتضيع بسبب الكنس اللى بتتعرض له الزريعه من بلطجيه لاتهمهم الامصلحتهم الخاصه فى جنى الاموال باى شكل...والعجيب ان حرس الحدود بيرخص للناس دى حرق ونسف الثروه السمكيه من اساسها..واعتقد ان الدوله محرمه صيد الزريعه.ان مايجرى على شواطئ السويس جريمه..تتم بتصريح من مالايملك(حرس الحدود)لمن لايستحق.(تجار الزريعه)..ارجوا النشر على اوسع نطاق حتى ينال هؤلاء ومن يحميهم.ومن يشاركهم..فى هذه التجاره المحرمه.حسابهم ..انقذوا ثروتنا السمكيه.